حكايات نفسية الممغنطة

الممغّنطة


رن جرس الهاتف في مكتب الضابط بمخفر الشرطة الذي بادر بالاستجابة على الفور.

* هلا هلا !!. الملازم سليمان يتكلم. مين معاى ؟.

وجاءه صوت نسائي من الطرف الآخر:

+ صبحك الله بالخير حضرة الضابط سليمان. أنا سعدية بت الحسين. بتصل من عنبر النفسية بالمستشفى الكبير.

* الله يكتب سلامتك ويعافيك يا أخت سعدية. أية خدمة؟.

+ ما بتقصر حضرة الضابط. أنا في المستشفى من ثلاثة أيام. الدكتور أصر أدخل العنبر قال نفسياتي تعبانه وملخبطة. هو الله يسلمك خايف على يمكن أعمل في نفسي حاجة مش كويسة.

*الله يحفظك من كل مكروه. في شي مزعلك يا أخت سعدية؟.

+كلو من الشاب القابلني في" ألمول " من أيام. أصلوا كنت يتمشى وأتفرج على المحلات.

*سوا لك أيش الملعون؟. شباب الأيام دى كلهم طايشين وما متربين.

+ تصور حضرة الضابط فجأة وقف قدامى زي الشيطان الرجيم وعاين فى وجهى شديد. أنا أتخضيت وأتلخبطت شويه فى الأول. بعدها أتسمرت فى مكانى ذى الأتشليت كأنى منومة بالمغناطيس.

* عايز منك إيه الشقي ده؟.
+ بدون ما يستأذن منى دس في أيدي ورقة فيها رقم "موبايلو". وكمان الجريء طلب منى رقم "موبايلى" كمان.

*طبعا ما أعطيتيه. هي حصلت لهذا الحد؟.

+ أقول لك الصدق وسامحني حضرة الضابط، كنت وقتها زي المنومة وفاقدة الأرادة. وبدون ما أدرى أعطيتو الرقم واسمي كمان.

* أسلوب التنويم بالمغناطيس ده جديد علينا في عملنا بالشرطة ما سمعت عنه قبل اليوم. الشباب الشقيين كلو يوم يطلعوا لينا بأسلوب إجرامي جديد. دى الفضائيات بتعلمو منها كل الخرابيط دى.

+ لكن تقدرو تعملو معاه شى؟.

* أعطيني رقم تلفونه. الشقي حنحصلو اليوم قبل بكرة حتى ولو كان تحت الأرض ونحضرو للقسم.

+ بأمانة طال عمرك تسووا فيه أيه لو صدتوه؟.

* يا ويلو التعيس. يا ويلو لو وقع في أيدينا. نقدمو للقاضي عشان يأدبو ليك. يمكن يعطيه أربعين جلده ويسجنو كمان.

+ معليش حضرة الضابط. سامحني دا ما الشى الأبغاه.

* ما يخالف. لو يرضيك نعطيه علقة ساخنة ما ينساها كل حياتو عشان ما يكرر فعلته الحقيرة ويستعمل مغناطيسو مع حرمة تانيه.

+ كمان أعذرني حضرة الضابط. دا ما الشى البفكر فيه.

* وكان يرضيك يا ست البنات نحلق شعر راسو بالموس وننشر صورتو في الجرايد عشان نفشلو أمام كل خلق الله.

+ الله يخليك حضرة الضابط. كمان سامحني. أنت ما وصلت للشى الأبغيه.

* أتدللي يا أخت سعديه. أي شي تبقيه نسوى فيه، نحن حاضرين وتحت الخدمة.

+ ممنونة وشاكرة ليك فضلك يا حضرة الضابط. أنا عارفاك أصيل وما بتقصر. طال عمرك لو حصلتوه ممكن تسألوه ليه هو ما بتصل بى، وكمان ما بيرد على تلفوناتي و"مسجاتى". أنا أصلوا أتعقدت ومرضت من تصرفو دا معاى. زى ما قال الدكتور يمكن اعمل فى نفسى حاجة مش كويسة.